उघड्यावर दारू पिणाऱ्यावर आणि अवैध दारू बाळगणाऱ्यांवर चाकण पोलिसांनी धडक कारवाई करण्याची मोहीम सुरू केली आहे. चाकण पोलिसांनी रविवारी रात्री उशिरा केलेल्या कारवाईत वीस तळी रामांना जेरबंद केले. ही कारवाई अखंडितपणे सुरू ठेवणार असल्याची माहिती चाकण पोलीस ठाण्याचे वरिष्ठ पोलीस निरीक्षक संजय सोळंके यांनी दिली.
चाकण पोलीस ठाण्याच्या हद्दीत सार्वजनिक ठिकाणी गेल्या अनेक दिवसांपासून रात्रीच्या वेळी मद्यपान करून गोंधळ घालण्यामुळे नागरिकांमध्ये प्रचंड नाराजी निर्माण झाली होती. त्यामुळे चाकण पोलीस ठाण्याचे वरिष्ठ पोलीस निरीक्षक संजय सोळंके यांच्या मार्गदर्शनाखाली गुन्हे अन्वेषण पथकाचे पोलीस निरीक्षक राहुल पाटील, निरीक्षक सचिन मोरखंडे, पोलीस हवालदार शिवाजी चव्हाण, भैरोबा यादव, रोहिदास मोरमारे, महादेव भिकडं, राम लोखंडे, अमोल माटे, उषा होले, सरला ताजणे या पोलीस पथकाने ही धाडसी मोहीम राबवली. उघड्यावर दारू पिणे, सार्वजनिक ठिकाणी मोठ्याने बोंबलणे, वाहतुकीत अडथळा निर्माण करणे अशा कारणावरून या कारवाईत तब्बल वीस जणांवर बॉम्बे पोलीस कायद्यांतर्गत गुन्हा दाखल करून त्या सर्वांना अटक करण्यात आली. चाकण पोलीस याप्रकरणी अधिक तपास करत आहेत.
" सार्वजनिक ठिकाणी शिस्त राखण्यासाठी पोलिसांनी अशा प्रकारच्या धाडसी मोहिमा सुरू केल्या आहेत. धार्मिक अथवा गर्दीच्या ठिकाणी कुणीही दारू प्यायला बसू नये. धिंगाणा घालून शिस्तभंग केल्यास तळीरामांवर कडक आणि सक्त कारवाई करण्यात येईल." - संजय सोळंके, वरिष्ठ पोलीस निरीक्षक, चाकण.