ऐन दिवाळीत घरफोडी चोरीचे गुन्हे करणाऱ्या सराईत चोरट्यास स्थानिक गुन्हे शाखा व नारायणगाव पोलीस स्टेशन पुणे ग्रामीण पोलिसांनी अटक करून त्याच्याकडून ३ गुन्हे उघडकीस आणून सुमारे १६ तोळे वजनाचे सोन्याचे दागिने ,८४१ ग्रॅम वजनाचे चांदीचे दागिने ,रोख रक्कम ,मोटार सायकल असा एकूण १४ लाख ३७ हजार ६५० रुपये किंमतीचा मुद्देमाल हस्तगत करण्यात आला आहे .
नारायणगाव (ता .जुन्नर ) येथील विटेमळ्यात राहणारे विष्णू भागुजी सांगडे (वय ६२ वर्ष ,रा .वैभवलक्ष्मी सोसायटी ए .विंग तिसरा मजला फ्लॅट नं .२१ )हे १४ ऑक्टोबर २०२५ रोजी घराला कुलूप लावून नारायणगाव येथील मंदिरात काकडा आरतीसाठी गेले असताना पहाटेच्या सुमारास एका अज्ञात व्यक्तीने घराचा कडी कोयंडा तोडून घरात प्रवेश करून बेडरूममधील लाकडी कपाटातून ११ लाख २० हजार रुपये किंमतीचे सोन्या चांदीचे दागिने लंपास केले होते .त्याअनुषंगाने सांगडे यांनी नारायणगाव पोलीस स्टेशनमध्ये फिर्याद नोंदवली होती .
सदर गुन्ह्याच्या अनुषंगाने पुणे ग्रामीणचे पोलीस अधीक्षक यांनी स्थानिक गुन्हे शाखा तसेच नारायणगाव पोलीस स्टेशन यांना मार्गदर्शन केले होते .सदर गुन्ह्याचा तपास करत असताना घटनास्थळावरील आजूबाजूच्या परिसरातील सीसीटीव्ही फुटेज तपासण्यात आले .त्या सीसीटीव्ही फुटेजमध्ये एका काळ्या रंगाची मोटारसायकलवरील संशयीताचा सहभाग असल्याचे निष्पन्न झाले.
त्यानंतर स्थानिक गुन्हे शाखा व नारायणगाव पोलीस स्टेशन या संशयित मोटारसायकलचा शोध घेत असताना पथकातील स्थानिक गुन्हे शाखेचे पोलीस अंमलदार अक्षय नवले यांना गोपनीय बातमीदाराकडून माहिती मिळाली की ,गुन्ह्यातील संशयित मोटारसायकल ही सीबीझेड मोटारसायकल असून विशाल दत्तात्रय तांदळे (सध्या रा .मंचर ,ता .आंबेगाव ,जि .पुणे )हा वापरत आहे .तपास पथक या आरोपीचा शोध घेत असताना आरोपी नारायणगाव परिसरात येणार असल्याची माहिती मिळाल्याने नारायणगाव परिसरात पथकाने सापळा रचून आरोपी विशाल दत्तात्रय सांगडे यास ताब्यात घेऊन त्याच्याकडे अधिकची चौकशी केली असता त्याच्यावर यापूर्वी २८ गुन्हे दाखल असून सदरचा गुन्हाही त्यानेच केला असल्याचे सांगितले .आरोपी सध्या न्यायालयीन कोठडीत आहे .
सदरची कामगिरी ही पुणे ग्रामीणचे पोलीस अधीक्षक संदीप सिंह गिल्ल ,अप्पर पोलीस अधीक्षक रमेश चोपडे ,जुन्नर उपविभागीय पोलीस अधिकारी धनंजय पाटील ,यांच्या मार्गदर्शनाखाली स्थानिक गुन्हे शाखेचे पोलीस निरीक्षक अविनाश शिळीमकर ,नारायणगाव पोलीस स्टेशनचे सहायक पोलीस निरीक्षक प्रवीण सपांगे ,स्थानिक गुन्हे शाखेचे सहायक पोलीस निरीक्षक महादेव शेलार ,पोलीस अंमलदार दीपक साबळे ,राजू मोमीन ,अक्षय नवले ,मंगेश लोखंडे ,सत्यम केळकर ,सोमनाथ डोके ,निलेश जाधव ,पोलीस सब इन्स्पेक्टर सोमेश्वर शेटे ,यांनी केली आहे .