२२५ घरांचा वीजपुरवठा खंडित • काही वाहनांचे नुकसान • सुदैवाने जीवितहानी नाही
पुणे, ६ जुलै — शहरातील चव्हाणनगर भागात रविवारी रात्री अचानक वीजवाहिनीचे दोन खांब कोसळल्याने मोठी अनपेक्षित अडचण निर्माण झाली. ही घटना रात्री ९ च्या सुमारास महावितरणच्या मार्केट यार्ड उपविभागातील तीन हत्ती चौकातून जाणाऱ्या रस्त्यावर घडली.
या अपघातामुळे २२ केव्ही संभाजीनगर वाहिनीवरील दोन रोहित्रांतील सुमारे २५० वीजग्राहकांचा वीजपुरवठा पूर्णतः खंडित झाला. काही वाहनांवर खांब कोसळल्याने वाहनांचे नुकसान झाल्याचे निदर्शनास आले असून, सुदैवाने कोणतीही जीवितहानी झाली नाही, ही दिलासादायक बाब आहे.
महावितरणच्या तांत्रिक पथकाने युद्धपातळीवर दुरुस्तीचे काम सुरू केले असून, रात्रीतूनच नवीन खांब उभारून वीजपुरवठा पूर्ववत करण्याचे प्रयत्न सुरू आहेत. इतर वीजग्राहकांना पर्यायी वाहिनीद्वारे वीजपुरवठा सुरू ठेवण्यात आला आहे.
महावितरणच्या अधिकाऱ्यांनी दिलेल्या माहितीनुसार, बाधित परिसरात लवकरच वीजपुरवठा सुरळीत करण्यात येईल. घटनास्थळी महावितरण अधिकारी, पोलीस तत्काळ दाखल झाले असून, नागरिकांच्या सुरक्षिततेसाठी आवश्यक ती खबरदारी घेतली जात आहे.