सिंहगड रस्ता येथील तुकाईनगर परिसरात गुरुवारी (दि. २६ जून) दुपारी भरधाव ट्रकच्या धडकेत १९ वर्षीय महाविद्यालयीन विद्यार्थिनीचा मृत्यू झाल्याची हृदयद्रावक घटना घडली. मृत विद्यार्थिनीचे नाव सई श्रीकांत भागवत (वय १९, रा. भन्साळी कॅम्पस, तुकाईनगर, वडगाव बुद्रुक) असे असून, तिच्या निधनामुळे परिसरात शोककळा पसरली आहे.
या प्रकरणी सिंहगड रोड पोलीस ठाण्यात अज्ञात ट्रक चालकाविरोधात गुन्हा दाखल करण्यात आला आहे. सईच्या आई दीपश्री श्रीकांत भागवत (वय ४८) यांनी पोलिसांकडे दिलेल्या फिर्यादीवरून ही कारवाई करण्यात आली आहे.
पोलिसांनी दिलेल्या माहितीनुसार, सई एस.पी. महाविद्यालयात कला शाखेच्या दुसऱ्या वर्षात शिक्षण घेत होती. गुरुवारी दुपारी ती दुचाकीवरून घरी जात असताना तुकाईनगर परिसरात भरधाव ट्रकने तिच्या दुचाकीस जोरदार धडक दिली. या अपघातात तिच्या डोक्याला गंभीर दुखापत झाली.
अपघाताची माहिती मिळताच सहाय्यक पोलीस आयुक्त अजय परमार आणि सिंहगड रोड पोलीस ठाण्याचे वरिष्ठ निरीक्षक दिलीप दाईंगडे यांनी घटनास्थळी धाव घेतली. सईला तातडीने जवळच्या खासगी रुग्णालयात दाखल करण्यात आले, मात्र उपचारादरम्यान तिचा मृत्यू झाला.
दरम्यान, अपघातानंतर ट्रकचालक घटनास्थळावरून फरार झाला असून, पोलिसांनी त्याचा शोध सुरू केला आहे. या प्रकरणाचा पुढील तपास पोलीस उपनिरीक्षक समीर कदम करत आहेत.
या अपघातामुळे परिसरात मोठा संताप व्यक्त करण्यात येत असून, नागरिकांनी वाहतूक नियंत्रणासाठी कठोर उपाययोजना करण्याची मागणी केली आहे.