शिरोली बुद्रुक (ता. जुन्नर) येथील लक्ष्मण शंकर बोऱ्हाडे आणि त्यांच्या पत्नी विमल लक्ष्मण बोऱ्हाडे या ज्येष्ठ दाम्पत्याचे सहा तोळे सोन्याचे दागिने पॉलीश करून देण्याच्या बहाण्याने दोन अज्ञात चोरट्यांनी लंपास केले.त्यामध्ये तीन तोळ्याचे मंगळसूत्र, एक तोळ्याची माळ, तसेच दिड तोळ्याची चेन, या दागिन्यांचा सामावेश आहे.
गुरुवारी (ता. २०) दुपारी बारा वाजण्याच्या सुमारास काळ्या रंगाच्या पल्सर दुचाकीवरून लक्ष्मण शंकर बोऱ्हाडे या ज्येष्ठ नागरिकांच्या घरापाशी आलेले चोरट्यांनी देव्हाऱ्यातील देव उजळून देतो, तसेच चांदी- सोनं पॉलीश करतो, असे सांगून, त्यांनी घराच्या देव्हाऱ्यातील चांदीचा देव उजळून दिला. त्यानंतर त्यांनी, 'आम्ही दागिने पॉलीश करून देतो,' असे सांगून त्यांच्याकडून दागिने मागितले. या दाम्पत्याने आपल्या जवळचे सोन्याचे दागिने त्यांच्याकडे दिले. दागिन्यांवर तपकिरी रंगाची पावडर टाकून त्यांनी एक झाकणाचा स्टीलचा डबा आणायला सांगितले. या डब्यात पाणी घेऊन त्यात हळद टाकून दागिने टाकल्याचे चोरट्यांनी भासवले व सदर डबा गॅसवर उकळण्यास ठेवायला सांगितला. त्यानंतर त्यांनी या दाम्पत्यास एक छोटी पावडरची पिशवी देऊन त्यात पॉलीश पावडर असल्याचे सांगितले व तेथून पोबारा केला. काही वेळानंतर लक्ष्मण बोऱ्हाडे यांनी डबा उचकून पाहिले असता दागिने नसल्याचे पाहिल्यावर आपली फसवणूक झाल्याचे त्यांच्या लक्षात आले. त्यानंतर त्यांचा मुलगा मल्हारी बोऱ्हाडे याने घराजवळील आणि परिसरातील सीसीटीव्ही फुटेज पाहिले असता त्यात दोन चोरटे दुचाकीवरून साखर कारखान्याच्या दिशेने गेल्याचे आढळून आले. या घटनेबाबत जुन्नर पोलिस ठाण्यात तक्रार दाखल करण्यात आली आहे.