पुणे ६ नोव्हेंबर २०२५ : झी टीव्हीवरील लोकप्रिय मालिका ‘जाने अनजाने हम मिले’ प्रेक्षकांच्या मनात वेगळं स्थान निर्माण करत आहे. या मालिकेची हृदयस्पर्शी कथा आणि रीत (आयुषी खुराणा) व राघव (भरत अहलावत) यांच्यातील सुंदर केमिस्ट्रीमुळे प्रेक्षकांचा प्रतिसाद दिवसेंदिवस वाढतो आहे. सध्या मालिकेत भावनिक वळण दिसत असलं, तरी पडद्यामागचं चित्र मात्र अगदी उलट आहे – आनंद, हास्य आणि आपुलकीनं भरलेलं!
शूटिंगच्या गडबडीतही हे कलाकार एकमेकांशी वेळ घालवायला विसरत नाहीत. दिवसभराचं काम संपलं की घरी धाव घेण्याऐवजी हे सगळे मिळून गप्पा, खाणं-पिणं आणि मजा करत छान क्षण तयार करतात.
भरत अहलावत म्हणाला, “आमचा सेट घरासारखा वाटतो. कामानंतर आम्ही एकत्र बसतो, काहीतरी खायला मागवतो आणि गप्पा मारतो. कधी माझ्या आईचं घरचं जेवण सगळ्यांसाठी येतं, आणि आता ती एक गोड परंपरा झाली आहे. या सगळ्या क्षणांमुळे आमचं एकत्र काम करणं आणखी खास होतं.”
आयुषी खुराणा हसत म्हणाली, “शूटिंगदरम्यान आम्ही पात्रांच्या भावना जगत असतो. त्यामुळे कॅमेरा बंद झाला की थोडं स्वतःसारखं जगणं महत्त्वाचं वाटतं. आम्ही दोघे पिझ्झा खायला बाहेर जातो, दिवसभरातील गंमतीदार गोष्टी शेअर करतो, आणि दुसऱ्या दिवशी नव्या ऊर्जेनं परत सेटवर जातो.”
कीर्तीच्या भूमिकेत दिसणारी गौरी अग्रवाल सांगते, “आमचा आवडता चहाचा कट्टा सेटजवळच आहे. तिथला कडक चहा आणि बन मस्का आमच्या दिवसभराचा थकवा घालवतो. त्या गप्पांतूनच आमच्या सर्वात मजेशीर आठवणी तयार होतात.”
या छोट्या पण मनाला भिडणाऱ्या क्षणांमुळे ‘जाने अनजाने हम मिले’च्या सेटवरचं वातावरण घरासारखं वाटतं. पडद्यामागची ही खरी मैत्रीच त्यांच्या ऑन-स्क्रीन केमिस्ट्रीतून झळकते, जी मालिकेला अजून खास बनवते.