सासवड नगरपरिषदेवर प्रथमच ‘कमळ’ फुलणार.. आमदार योगेश टिळेकर यांचा विश्वास
सासवड नगरपरिषदेच्या आगामी निवडणुकीत भारतीय जनता पक्षाचा झेंडा फडकणार, भाजपाच्या नगराध्यक्ष पदासह सर्व नगरसेवक बहुमताने विजयी होणार असा ठाम विश्वास आमदार तथा निवडणूक प्रभारी योगेश टिळेकर यांनी व्यक्त केला. पक्षाने नगराध्यक्षपदासाठी माजी नगराध्यक्षा आणि मातृतुल्य व्यक्तिमत्त्व असलेल्या आनंदीकाकी जगताप यांना उमेदवारी दिली आहे. शुक्रवारी ग्रामदैवत श्री भैरवनाथांचा आशीर्वाद घेऊन प्रचाराचा शुभारंभ करताना टिळेकर बोलत होते. यावेळी श्री भैरवनाथ मंदिर ते शिवतिर्थ अशी भव्य पदयात्रा काढण्यात आली.
आमदार टिळेकर म्हणाले, “स्वर्गीय चंदुकाका जगताप आणि त्यांच्या परिवाराच्या सामाजिक आणि राजकीय विकासाचे काम पुढे सुरू ठेवण्यासाठी, तसेच केंद्र आणि राज्य शासनाच्या विविध योजना सासवडमध्ये प्रभावीपणे राबवण्यासाठी ही निवडणूक महत्त्वाची आहे.”ते पुढे म्हणाले, “माजी आमदार संजय जगताप यांच्या मार्गदर्शनाखाली सासवड नगरपरिषदेवर प्रथमच कमळ फुलणार आहे. कमळ हेच आपले उमेदवार आहे, हे लक्षात घेऊन सर्वांनी एकत्रितपणे काम करावे.”
टिळेकर यांनी नगराध्यक्षपदाच्या उमेदवार आनंदीकाकी जगताप यांच्या प्रदीर्घ कारकिर्दीचा गौरव केला. आनंदीकाकी यांनी ३० वर्षे नगरसेविका, दोन वेळा नगराध्यक्षा आणि अनेक वर्षे गटनेतेपदाची जबाबदारी यशस्वीपणे सांभाळली आहे. शिक्षण, सहकारी संस्था आणि सामाजिक कामांच्या माध्यमातून त्यांनी परिसरातील अनेकांना आधार आणि सक्षम केले आहे, असे त्यांनी सांगितले.
माजी आमदार आणि भाजपचे नेते संजय जगताप यांनी यावेळी बोलताना, पंतप्रधान नरेंद्र मोदी आणि मुख्यमंत्री देवेंद्र फडणवीस यांची सर्वसमावेशक विकासाची सत्ता सासवड नगरपरिषदेत आणण्याचे आवाहन केले.
ते म्हणाले, ‘सासवडचे सिंगापूर’ करण्यासाठी भारतीय जनता पक्षाच्या सर्व उमेदवारांना प्रचंड बहुमताने निवडून द्यावे. पुढील काळात संपूर्ण शहरात भूमिगत गटार योजना, भूमिगत विद्युत वाहिनी आणि सर्व रस्ते सिमेंट काँक्रीटचे करणार असल्याचे आश्वासन त्यांनी दिले. तसेच, दिवंगत लोकनेते चंदूकाका जगताप यांच्या विकास आणि स्वच्छतेचा वारसा पुढे चालवण्याचे आवाहन त्यांनी केले.
यावेळी जिल्हाध्यक्ष चंद्रशेखर वढणे, गिरीष जगताप, राजवर्धिनी जगताप, आनंद जगताप यांच्यासह सर्व उमेदवार आणि कार्यकर्ते मोठ्या संख्येने उपस्थित होते. संजय चव्हाण यांनी कार्यक्रमाचे सूत्रसंचालन केले तर आनंद जगताप यांनी उपस्थितांचे आभार मानले.
याप्रसंगी राष्ट्रवादीचे गणेश जगताप, निवृत्ती तथा नेवाभाऊ गिरमे, रोहिदास मारुती गिरमे, शिवाजी मारुती गिरमे, संजय निवृत्ती गिरमे, शुभम शिवाजी गिरमे, आकाश रोहिदास गिरमे, प्रथमेश रोहिदास गिरमे, लक्ष्मण भाऊ गिरमे यांसह अनेक कार्यकर्त्यांनी आमदार योगेश टिळेकर आणि माजी आमदार संजय जगताप यांच्या नेतृत्वाखालील भाजपात प्रवेश केला.