ठाण्याच्या उपवन तलावात मित्रांसह पोहायला गेलेला १७ वर्षीय युवक तलावात बुडाला. ही घटना सोमवारी (दि. १७) दुपारच्या सुमारास घडली. सायंकाळ पर्यंत बुडालेल्या मुलाचा पाण्यात शोध सुरू होता. मात्र, त्याचा शोध लागला नसल्याचे आपत्ती व्यवस्थापन पथकाने सांगितले.
आदित्य लक्ष्मण पवार ( वय १७, रा. साई सहकार सोसायटी, लोकमान्य नगर पाडा क्रमांक 4, ठाणे) हा युवक ठाकूर कॉलेज, सावरकर नगर, ठाणे येथे इयत्ता बारावी मध्ये शिक्षण घेत आहे.
हा युवक आज दुपारी १.४५ वाजता आपल्या मित्रांसोबत उपवन तलावात पोहण्यासाठी गेला होता. त्याचवेळी पाण्याचा अंदाज न आल्याने आदित्य तलावात बुडाला.
या घटनेची माहिती मिळताच घटनास्थळी वर्तकनगर पोलीस, आपत्ती व्यवस्थापन पथक यांनी धाव घेतली. त्वरित दोन बोटींच्या सहाय्याने बेपत्ता आदित्यचा शोध सुरु केला. मात्र, संध्याकाळ पर्यंत शोध पथकाला यश आले नव्हते.