दुचाकीला पुढे जाण्यास वाट न दिल्याने तिघांनी एका रशियन दाम्पत्याला बेदम मारहाण केली. कोरेगाव पार्क भागात ही घटना घडली.
या प्रकरणी दुचाकीवरील तीन जणांविरुद्ध गुन्हा दाखल करण्यात आला आहे. याबाबत एका रशियन नागरिकाने कोरेगाव पार्क पोलीस ठाण्यात फिर्याद दिली आहे. तक्रारदार मूळचे रशियाचे आहेत.
ते नोकरीनिमित्त पुण्यात वास्तव्यास असून एका खासगी कंपनीत सल्लागार आहेत. रशियन दाम्पत्य कोरेगाव पार्क भागातून निघाले होते. त्या वेळी दुचाकीस जागा न मिळाल्याने दुचाकीवरील तिघांनी त्यांच्याशी वाद घातला. तसेच त्यांना मारहाण केली.
आरोपी दुचाकीवरुन पसार झाले. कोरेगाव पार्क पोलिसंनी परिसरातील सीसीटीव्ही कॅमेऱ्यांनी केलेले चित्रीकरण तपासासाठी ताब्यात घेतले असून, पसार झालेल्या आरोपींचा शोध घेण्यात येत आहे.