मुंबई: विधानसभा निवडणुकीच्या निकालानंतर राष्ट्रवादी काँग्रेस पक्ष शरद पवार यांच्या नेतृत्वाखाली भाजपसोबत हातमिळवणी करणार का, याबाबत राजकीय वर्तुळात जोरदार चर्चा सुरु आहे. गुरुवारी शरद पवार यांच्या वाढदिवसानिमित्त त्यांच्या दिल्लीतील निवासस्थानी अजित पवार यांनी सहकुटुंब भेट घेतली. त्यानंतर शुक्रवारी दिल्लीतील उद्योगपती गौतम अदानी यांच्या घरी शरद पवार गटातील एका बड्या नेत्याने भाजपच्या केंद्रीय नेत्यासोबत गुप्त बैठक घेतल्याचे समोर आले आहे.
या घटनेमुळे महाराष्ट्राच्या राजकारणात पुन्हा एकदा मोठ्या उलथापालथीची शक्यता निर्माण झाली आहे.
शरद पवार गटात मतभेद
विधानसभा निवडणुकीचे निकाल लागल्यानंतर शरद पवार गटातील आमदार व खासदारांमध्ये सत्तास्थापनेसंदर्भात चलबिचल दिसून आली आहे. 4 डिसेंबरला दिल्ली येथे शरद पवार गटाच्या खासदारांची बैठक झाली होती. या बैठकीत सत्तेत सामील होण्याच्या मुद्द्यावर चर्चा झाली. यामध्ये दोन गट स्पष्टपणे दिसून आले.
पहिला गट भाजपसोबत स्वतंत्र अस्तित्व ठेवून सत्तेत सहभागी होण्याच्या बाजूने आहे, तर दुसरा गट अजित पवार यांच्या राष्ट्रवादी गटात सामील होण्याच्या मताचा आहे. तथापि, शरद पवार गटातील बहुतांश आमदार व खासदार सत्तेत जाण्याच्या बाजूने असल्याचे कळते. जर असे झाले, तर महाविकास आघाडीचे अस्तित्व धोक्यात येऊ शकते.
अदानी यांच्या घरी गुप्त बैठक_
गुरुवारी रात्री अदानी यांच्या दिल्लीतील निवासस्थानी शरद पवार गटातील एका नेत्याने भाजपच्या केंद्रीय नेत्यासोबत गुप्त बैठक घेतल्याचे सूत्रांनी सांगितले. या बैठकीत आगामी स्थानिक स्वराज्य संस्थांच्या निवडणुका आणि शरद पवार गटाची भूमिका यावर चर्चा झाल्याचे समजते.
पडद्यामागील हालचाली आणि संभाव्य परिणाम
गेल्या काही दिवसांपासून शरद पवार गटातील काही खासदार अजित पवार गटात सामील होणार असल्याच्या चर्चांना जोर आला होता. याच पार्श्वभूमीवर शरद पवार यांनी भाजपसोबत जाण्याचा निर्णय घेतल्यास काँग्रेस व उद्धव ठाकरे गटाची भूमिका काय असेल, याकडे सर्वांचे लक्ष आहे.
जर शरद पवार गट भाजपसोबत सत्तेत सामील झाला, तर महाराष्ट्राच्या राजकारणात मोठा बदल होईल. महाविकास आघाडीचे समीकरण कोसळण्याची शक्यता आहे, तसेच भाजप-राष्ट्रवादीचे नवीन समीकरण राज्यातील राजकीय गणिते पूर्णपणे बदलून टाकू शकते.
आगामी काही दिवसांत या हालचालींचा अंतिम निर्णय होईल आणि त्यावर महाराष्ट्राच्या राजकीय दिशेचा निर्णय अवलंबून राहील.