पिंपरखेड व परिसरात मागील वीस दिवसांपासून दहशत निर्माण करणारा नरभक्षक बिबट अखेर वनविभागाच्या विशेष मोहिमेत ठार करण्यात आला. या बिबट्याच्या हल्ल्यात तीन जणांचा दुर्दैवी मृत्यू झाला होता, तर परिसरात भीतीचे आणि रोषाचे वातावरण निर्माण झाले होते.
दिनांक १२ ऑक्टोबर रोजी शिवन्या शैलेश बोंबे (वय ५ वर्षे ६ महिने), २२ ऑक्टोबर रोजी भागुबाई रंगनाथ जाधव (वय ८२ वर्षे) आणि २ नोव्हेंबर रोजी रोहन विलास बोंबे (वय १३ वर्षे) या तिघांचा बिबट हल्ल्यात मृत्यू झाला. सलग घडलेल्या या घटनांमुळे पिंपरखेड, जुन्नर, शिरूर, आंबेगाव आणि खेड तालुक्यात संतापाची लाट उसळली.
तणावपूर्ण वातावरण आणि ग्रामस्थांचा रोष
बिबट हल्ल्यांच्या निषेधार्थ दिनांक १२ आणि २२ ऑक्टोबर रोजी पंचतळे येथे बेल्हे–जेजुरी राज्यमार्ग रोखण्यात आला, तर ३ नोव्हेंबर रोजी मंचर येथे पुणे–नाशिक महामार्ग सुमारे १८ तास रोखून ग्रामस्थांनी तीव्र आंदोलन केले. २ नोव्हेंबर रोजी रोहन बोंबे या मुलाच्या मृत्यूनंतर संतप्त जमावाने वनविभागाच्या गस्ती वाहनासह स्थानिक बेस कॅम्पची इमारत पेटवून दिली होती.
वनविभागाची तातडीची कारवाई
घटनांच्या पार्श्वभूमीवर वनसंरक्षक पुणे श्री. आशिष ठाकरे यांनी तातडीने प्रधान मुख्य वनसंरक्षक (वन्यजीव) व मुख्य वन्यजीव रक्षक, महाराष्ट्र राज्य, नागपूर यांच्याकडून आवश्यक परवानगी घेतली. त्यानंतर रेस्क्यू संस्था पुणेचे पशुचिकित्सक डॉ. सात्विक पाठक, शार्पशूटर जुबिन पोस्टवाला व डॉ. प्रसाद दाभोळकर यांच्यासह वनविभागाची विशेष टीम घटनास्थळी तैनात करण्यात आली.
थरारक शोधमोहीम आणि बिबट ठार
परिसरात दिवसभर कॅमेरा ट्रॅप लावून बिबट्याच्या हालचालींचे निरीक्षण करण्यात आले. रात्री तीन थर्मल ड्रोनच्या सहाय्याने शोध घेतला असता घटनास्थळापासून सुमारे ४०० ते ५०० मीटर अंतरावर बिबट दिसला. त्याला बेशुद्ध करण्यासाठी डार्ट मारण्यात आला, परंतु प्रयत्न अपयशी ठरल्याने बिबट चवताळून हल्ला करण्याच्या तयारीत आला. आत्मसंरक्षणार्थ शार्पशूटरने रात्री सुमारे १०.३० वाजता गोळी झाडली, यात बिबट ठार झाला.
ठार झालेला नर बिबट अंदाजे पाच ते सहा वर्षे वयाचा असल्याचे प्राथमिक अंदाज आहे. त्यानंतर बिबट्याचे शव पिंपरखेड येथे ग्रामस्थांना दाखविण्यात आले आणि शवविच्छेदनासाठी माणिकडोह बिबट निवारा केंद्रात हलविण्यात आले.
अधिकाऱ्यांचे मार्गदर्शन आणि ग्रामस्थांचा सहभाग
ही कारवाई वनसंरक्षक श्री. आशिष ठाकरे यांच्या मार्गदर्शनाखाली उपवनसंरक्षक श्री. प्रशांत खाडे, सहाय्यक वनसंरक्षक श्रीमती स्मिता राजहंस, श्री. अमृत शिंदे, वनपरिक्षेत्र अधिकारी श्री. निळकंठ गव्हाणे तसेच रेस्क्यू संस्थेचे सदस्य व स्थानिक ग्रामस्थांच्या मदतीने यशस्वीरीत्या पार पडली.
या यशस्वी मोहिमेनंतर परिसरातील ग्रामस्थांनी वनविभागाचे आभार मानले असून, बिबट्याच्या दहशतीतून गावाला दिलासा मिळाला आहे.