पुणे सोलापूर महामार्गावरील सोरतापवाडी (ता. हवेली) ग्रामपंचायत हद्दीत शनिवार (ता. २२ नोव्हेंबर) रोजी दुपारी साडे ३ वाजण्याच्या सुमारास दोन स्कूल बसचा भीषण अपघात झाला. या दोन बसमध्ये पहिली ते दुसरीच्या वर्गातील सुमारे ८० ते ९० विद्यार्थी असल्याची माहिती स्थानिक नागरिकांनी दिली आहे.
प्राथमिक माहितीनुसार, पुणे येथील नामांकित शाळेच्या दोन बस विद्यार्थ्यांना घेऊन उरुळी कांचन येथील रिसॉर्टवर सहलीसाठी गेल्या होत्या. सहल संपवून पुण्याकडे परतताना दुपारी साडेतीन वाजण्याच्या दरम्यान शौर्य वाडा हॉटेल (सोरतापवाडी ता. हवेली) समोर एक दुचाकी बसला आडवी आल्याने पुढील बस चालकाने अचानक ब्रेक मारला. मागून येणाऱ्या बसने समोरील बसला जोरदार धडक दिली. यात चालक व शाळेचा कर्मचारी गंभीर जखमी झाला आहे. तर विद्यार्थ्यांना किरकोळ मार लागला आहे. मिळालेल्या माहितीनुसार (एम एच १२ वाय बी ७५९६) या बसचा समोरील बस (एम एच १२ डब्ल्यू एक्स ५४७२) या बसला मागून जोरदार धडक दिली. ७५९६ या बसचा चालक अक्षय अंतरोळीकर वय ४५ हे जखमी झाले असुन बस मधील अजुन एक जण असे दोन जण गंभीर जखमी झाले असल्याचे प्रथमदर्शक नागरिकांनी सांगितले. तसेच बस चालक अक्षय अंतरोळीकर यांच्या सावधगिरीमुळे मोठा अपघात टळला.
अपघातात होऊन दीड तास उलटूनही पोलिस घटनास्थळी पोहोचले नसल्याने परिसरात नाराजी व्यक्त करण्यात आली. पुणे सोलापूर महामार्गावरील पुण्याचे दिशेने जाणारी वाहतूक तासाहून अधिक वेळ ठप्प झाली होती. तसेच दीड तास होऊन ही अपघात ग्रस्त बस रस्त्यातच उभी होती.