मुलभूत सुविधांसह माणसांचा आणि विशेषतः महिलांचा विकास व सक्षमीकरण हाच भाजप सरकारचा प्रमुख भर असल्याचे राज्याचे उच्च व तंत्रशिक्षण मंत्री चंद्रकांत पाटील यांनी सांगितले. गुरुवारी (ता. २७) सासवड येथे झालेल्या नगरपरिषद निवडणुकीच्या अनुषंगाने आयोजित विविध संवाद मेळाव्यांमध्ये शिक्षक, डाॅक्टर्स, महिला आणि व्यापारी वर्गाशी थेट संवाद साधला.
केंद्रामध्ये पंतप्रधान नरेंद्र मोदी आणि राज्यात मुख्यमंत्री देवेंद्र फडणवीस यांच्या नेतृत्वाखालील भाजप सरकारच्या सत्तेचा थेट फायदा सासवड आणि जेजुरी नगरपरिषदांना मिळवून देण्यासाठी, तसेच या दोन्ही नेत्यांचे हात बळकट करण्यासाठी, ना. पाटील यांनी भाजपच्या सर्व उमेदवारांना मतदान करण्याचे आवाहन केले. यावेळी पुरंदरचे माजी आमदार संजय जगताप, अशोक टेकवडे, विधानसभा अध्यक्ष बाबा जाधवराव, गिरीष जगताप, शहराध्यक्ष आनंद जगताप, सचिन पेशवे यांच्यासह सासवड नगरपरिषद नगराध्यक्ष पदाच्या उमेदवार आनंदीकाकी जगताप आणि जेजुरीचे सचिन सोनवणे यांच्यासह सर्व नगरसेवक पदाचे उमेदवार व कार्यकर्ते मोठ्या संख्येने उपस्थित होते.
भारताला ‘विश्वगुरू’ बनवण्यासाठी एकत्रित प्रयत्न गरजेचे:
शिक्षकांशी संवाद साधताना ना. चंद्रकांत पाटील यांनी पंतप्रधान नरेंद्र मोदींच्या नेतृत्वाखाली देश जगात चौथ्या क्रमांकावर आल्याचा गौरवपूर्ण उल्लेख केला. स्वातंत्र्याच्या शंभराव्या वर्षी देशाला प्रथम क्रमांकावर आणण्याच्या दृष्टीने सुरू असलेल्या प्रयत्नांमध्ये शिक्षकांनी समाजाला प्रेरीत करण्याचे आवाहन केले.
नवीन शैक्षणिक धोरण: शासनाने शिक्षण पद्धती बदलली असून नवीन शैक्षणिक धोरण (NEP) अवलंबिले आहे.
महत्त्वाचे घटक: मातृभाषेतील शिक्षण, संशोधन, व्यवसायाभिमुख शिक्षण आणि आपली ज्ञान परंपरा सर्वांपर्यंत पोहोचविणे महत्त्वाचे असल्याचे त्यांनी सांगितले.
वैद्यकीय क्षेत्र: सामान्यांपर्यंत आरोग्य सेवा पोहोचवा :
वैद्यकीय क्षेत्रातील मान्यवरांशी चर्चा करताना ना. पाटील यांनी केंद्र आणि राज्य शासनातर्फे आरोग्य आणि वैद्यकीय क्षेत्राबाबत राबविण्यात येत असलेल्या विविध योजनांची माहिती दिली. डॉक्टरांना आपल्या वैद्यकीय ज्ञानाचा उपयोग सामान्य नागरिकांना होण्यासाठी हातभार लावण्याचे आवाहन त्यांनी केले.
महिला सक्षमीकरण: ‘लेक लाडकी’सह विविध योजनांचा लाभ घ्या :
महिला वर्गाशी संवाद साधताना चंद्रकांत पाटील यांनी मुख्यमंत्री माझी लाडकी बहीण, लेक लाडकी, बचत गट आणि पोस्ट विभागातील विविध योजनांची माहिती दिली. महिलांना समाजात बरोबरीचे स्थान मिळवून देण्यासाठी केंद्र आणि राज्य शासन विशेष उपक्रम राबवित असल्याचे त्यांनी अधोरेखित केले.
व्यापारी वर्ग: विकासात भाजप नेहमीच सोबत :
व्यापारी वर्गासोबत चर्चा करताना ना. पाटील यांनी, व्यापारी वर्ग पहिल्यापासूनच जनसंघ आणि भाजपा बरोबर राहिला आहे, याची आठवण करून दिली.
व्यापारी हिताचे निर्णय: भाजपा सरकारने व्यापारी वर्गासाठी विविध कर माफ करणे, जीएसटी कमी करणे, तसेच व्यापार आणि उद्योगांसाठी विविध योजना राबविण्यावर शासन लक्ष केंद्रित करत असल्याचे त्यांनी सांगितले.
” राज्यात २८० नगरपरिषद व नगरपंचायत निवडणूका होत आहेत. यातील २५६ ठिकाणी भाजपचा नगराध्यक्षपदाचे उमेदवार आहेत. यातील २०० ठिकाणी काही अडचण येणार नाही. मोठ्या प्रमाणावर निवडणूका होत असल्याने सर्वच ठिकाणी युती शक्य नाही. त्यामुळे वेगवेगळ्या युती झाल्या आहेत. जीथे युती झाली नाही तिथे एकमेकांवर चिखलफेक न करता निवडणूक करण्याच्या सुचना दिल्या आहेत. प्रशासकीय राजवटीत काही ठिकाणी समस्या वाढल्या आहेत. सासवड नगरपरिषदेच्या आडलेल्या निधीबाबत मुखमंत्र्यांशी चर्चा करणार असल्याचे मंत्री चंद्रकांत पाटील यांनी सांगितले.