लोणंद पोलीस ठाण्याच्या हद्दीतील सालपे ता. फलटण येथील सावता सरस्वती काळे, वय ७५ , रा. सालपे, तालुका फलटण यांचा कुऱ्हाडीने डोक्यात घाव घातल्याने मृत्यु झाला असल्याची फिर्याद लोणंद पोलीसांत दाखल करण्यात आली आहे.
याबाबत लोणंद पोलीसांकडून मिळालेली अधिक माहीती अशी, सालपे येथील फिर्यादी मिथुन काज्या काळे याचे आजोबा सावता सरस्वती काळे यांचा फिर्यादीचे सावत्र भाऊ दत्ता काज्या काळे , महेश राजा काळे दोघे राहणार सालपे तालुका फलटण, तसेच दत्ता काळे यांचा सासरा अमित लवऱ्या शिंदे, वय ३५ वर्ष,रा. मोड तालुका खटाव जिल्हा सातारा यांनी घराच्या वाटणीवरून असलेल्या वादातून आपापसात संगनमत करून सोमवार दि. ३० रोजी सायं. पाच वाजताच्या सुमारास मयत सावता काळे यांना अमित शिंदे याने हाताने धरले तर दत्ता काळे याने हातातील कुऱ्हाडीने सावता काळे यांच्या डोक्यात घाव घालून गंभीर जखमी केले व महेश काळे याने दगड फेकून मारून आजोबा सावता काळे यांचा खून केला अशी फिर्याद मिथुन काळे याने लोणंद पोलीसांत दाखल केली आहे. घटनेचे गांभीर्य लक्षात घेवून सहायक पोलीस निरीक्षक सुशिल भोसले यांनी घटनास्थळावर भेट देत तपास सुरू करत गुन्हातील आरोपी महेश काज्या काळे व अमित लावऱ्या काळे या दोघांना ताब्यात घेतले. घटनास्थळावर सातारा येथून फाॅरेन्सिक टिमला देखील पाचारण करण्यात आले असून रात्री ऊशीरा पर्यंत पंचनामा करण्याचे काम सुरू होते.