मुंबई/अहिल्यानगर : शिवसेना मुख्य नेते आणि उपमुख्यमंत्री एकनाथ शिंदे यांच्या उपस्थितीत काल संध्याकाळी अहिल्यानगर महानगरपालिकेतील शिवसेना (उद्धव बाळासाहेब ठाकरे) पक्षाचे माजी नगरसेवक तसेच पदाधिकाऱ्यांनी शिवसेना पक्षात जाहीर प्रवेश केला. यावेळी एकनाथ शिंदे यांनी सर्व पदाधिकाऱ्यांचे पक्षात स्वागत करून त्यांना भावी सामाजिक आणि राजकीय वाटचालीसाठी शुभेच्छा दिल्या.
पुणे आणि मुंबईसोबतच अहिल्यानगरमध्येही ठाकरे गटातील अनेक माजी नगरसेवक आणि पदाधिकारी यांनी ठाकरेंची साथ सोडली. शहरातील तीन माजी नगरसेवकांनी उपमुख्यमंत्री एकनाथ शिंदे यांची भेटही घेतली आहे. माजी महापौर, त्यांचे पती आणि आणखी काही माजी नगरसेवकही लवकरच असाच निर्णय घेणार असल्याचे सांगण्यात येते. शिवसेना शिंदे गटाचे शहर प्रमुख सचिन जाधव यांनी याला दुजोरा दिला.
कोणाकोणाचा प्रवेश?
माजी नगरसेवक दीपक साहेबराव खैरे, माजी स्थायी समिती सभापती दत्ता बाबाराव जाधव, माजी नगरसेवक प्रशांत बाळू गायकवाड, महिला अंबिका बँकेच्या अध्यक्ष शोभना चव्हाण, माजी नगरसेवक आणि शहरप्रमुख दिलीप नानभाऊ सातपुते यांचा शिवसेनेत प्रवेश करणाऱ्या नेत्यांमध्ये समावेश आहे. यावेळी शिवसेना सचिव आणि उत्तर महाराष्ट्र संपर्कप्रमुख भाऊ चौधरी, पुण्यश्लोक अहिल्यानगरचे जिल्हाप्रमुख अनिल शिंदे आणि शहरप्रमुख अजित दळवी हेदेखील उपस्थित होते.
खैरेंचा घोडेलेंवर निशाणा
दुसरीकडे, छत्रपती संभाजीनगरचे माजी महापौर नंदकुमार घोडेले यांच्या संभाव्य शिवसेना प्रवेशावर शिवसेना उद्धव बाळासाहेब ठाकरे पक्षाचे नेते, माजी खासदार चंद्रकांत खैरे यांनी आपली प्रतिक्रिया व्यक्त केली. ‘पक्षाने एकाच घरात पाच वर्षे महापौरपद दिल्यावर नंदकुमार घोडेले व त्यांच्या कुटुंबाने उद्धव ठाकरे यांच्याशी प्रतारणा करणे योग्य नव्हते,’ अशा शब्दांत त्यांनी निशाणा साधला.
चंद्रकांत खैरे म्हणाले, ‘घोडेले बऱ्याच दिवसांपासून पक्षबदलाच्या विचारात होते. त्यांनी त्यांच्या कामासाठी पक्ष बदलला. त्यांच्या समाजाचे लोकदेखील त्यांच्या या निर्णयाबद्दल नाराज आहेत. उद्धव ठाकरे यांनी नंदकुमार घोडेले व त्यांच्या पत्नी अनिता घोडेले यांना महापौर केले. इतके दिल्यावरदेखील त्यांनी पक्ष सोडून जाणे योग्य नव्हते. अशा प्रकारामुळे माझे नाव खराब होते. घोडेले यांच्या पक्षबदलाला संमती नव्हती.’
‘ज्यांनी पक्ष सोडला, ज्यांनी गद्दारी केली त्यांच्याशी मी बोलत नाही आणि बोलणारदेखील नाही. उद्धव ठाकरे संकटात असताना त्यांची साथ आपण दिली पाहिजे. पैशासाठी, कामासाठी कुणी तिकडे जात असेल, तर ते बरोबर नाही,’ असे खैरे म्हणाले.