दोन जर्सी गायींची सुरक्षित सुटका; पिकअप वाहनासह रु. 2.50 लाखांचा मुद्देमाल जप्त
गोवंश रक्षकांकडून मिळालेल्या माहितीवर बारामती शहर पोलिसांची तत्पर कारवाई; जनावरांची वाहतूक करताना कायद्याचे काटेकोर पालन करण्याचे आवाहन
गोवंश जनावरांची बेकायदेशीर व संशयास्पद वाहतूक रोखणे, कत्तलीसाठी होणाऱ्या संभाव्य वाहतुकीला प्रतिबंध करणे तसेच वाहतुकीदरम्यान मुक्या प्राण्यांना अनावश्यक वेदना व त्रास होऊ नये यासाठी बारामती शहर पोलिसांनी तत्परतेने कारवाई करत दोन जर्सी जातीच्या गायींची सुरक्षित सुटका केली आहे. या कारवाईमध्ये महिंद्रा कंपनीचे पिकअप वाहन व दोन जर्सी गायी असा एकूण रु. 2,50,000/- किमतीचा मुद्देमाल जप्त करण्यात आला आहे.
मा. पोलीस अधीक्षक, पुणे ग्रामीण श्री. संदीप सिंह गिल्ल, मा. अपर पोलीस अधीक्षक श्री. गणेश बिरादार व मा. उपविभागीय पोलीस अधिकारी, बारामती श्री. चैतन्य कदम यांच्या आदेश व मार्गदर्शनाखाली, बारामती शहर पोलीस स्टेशनचे प्रभारी पोलीस निरीक्षक श्री. श्रीशैल चिवडशेट्टी यांच्या नेतृत्वात पोलीस उपनिरीक्षक श्री. सर्जेराव पुजारी, पोलीस हवालदार श्री. रामचंद्र शिंदे, पोलीस शिपाई श्री. विशाल चौधर व पोलीस शिपाई श्री. लतिफ इनामदार यांच्या पथकाने गोवंश बचाव कार्य करणाऱ्या टीममधील श्री. वैभव थोरात यांच्याकडून प्राप्त गोपनीय माहितीच्या आधारे सदर कारवाई केली.
दि. 03/09/2026 रोजी दुपारी सुमारे 12.00 वा. बारामती शहर हद्दीतील मॅकडॉल कंपनीसमोरील सार्वजनिक रस्त्यावर पांढऱ्या रंगाच्या महिंद्रा पिकअप वाहन क्र. MH-13-CU-2064 मधून दोन जर्सी जातीच्या गोवंश गायींची वाहतूक केली जात असल्याचे निदर्शनास आले. प्राप्त माहितीची तातडीने दखल घेत पोलिसांनी वाहन व त्यामधील जनावरांची पडताळणी केली असता वाहनामध्ये एक काळसर रंगाची जर्सी गाय व एक काळ्या-पांढऱ्या रंगाची जर्सी गाय मिळून आली.
सदर वाहनाचा चालक शब्बीर इमाम शेख, रा. आसू, ता. फलटण, जि. सातारा याच्याकडे गायींची मालकी, खरेदी-विक्री, गायी कोठून आणल्या, कोणत्या ठिकाणी व कोणाकडे घेऊन जात आहे, वाहतुकीचा उद्देश व अंतिम गंतव्य याबाबत विचारणा करण्यात आली. तसेच जनावरांच्या वाहतुकीसाठी आवश्यक पशुवैद्यकीय फिटनेस प्रमाणपत्र व इतर संबंधित कागदपत्रांची मागणी करण्यात आली. मात्र त्याच्याकडून त्यावेळी समाधानकारक व पडताळणीयोग्य माहिती तसेच आवश्यक कागदपत्रे सादर झाली नसल्याचे प्राथमिक तपासात समोर आले.
वाहनातील जनावरांच्या वाहतूक व्यवस्थेची पाहणी केली असता आवश्यक प्रथमोपचार, पाणी, चारा तसेच जनावरांच्या सुरक्षित वाहतुकीच्या अनुषंगाने आवश्यक असलेल्या व्यवस्थांचे पालन झाले नसल्याचे प्रथमदर्शनी निदर्शनास आले. गायींच्या मालकी व खरेदी-विक्रीच्या कागदपत्रांचा अभाव, अंतिम गंतव्य व वाहतुकीच्या उद्देशाबाबत समाधानकारक माहिती न मिळणे आणि घटनास्थळी आढळून आलेली एकंदर परिस्थिती यावरून सदर गोवंश जनावरांची कत्तलीच्या उद्देशाने वाहतूक होत असल्याचा वाजवी संशय निर्माण झाल्याने पोलिसांनी वाहन व दोन्ही गायी ताब्यात घेऊन पुढील कायदेशीर कार्यवाही केली.
याप्रकरणी बारामती शहर पोलीस स्टेशन गु.रजि.नं. 362/2026 अन्वये प्राण्यांवरील क्रूरता प्रतिबंधक अधिनियम, 1960 चे कलम 11(1)(d) तसेच Transport of Animals Rules, 1978 मधील Rule 47, 48, 49, 52, 54 व 56 प्रमाणे गुन्हा नोंद करण्यात आला आहे.
सदर कारवाईमध्ये महिंद्रा कंपनीचे पिकअप वाहन क्र. MH-13-CU-2064 किंमत रु. 2,00,000/-, एक काळसर रंगाची जर्सी गाय किंमत रु. 30,000/- व एक काळ्या-पांढऱ्या रंगाची जर्सी गाय किंमत रु. 20,000/- असा एकूण रु. 2,50,000/- किमतीचा मुद्देमाल जप्त करण्यात आला आहे. दोन्ही गोवंश जनावरांची पशुवैद्यकीय तपासणी व सुरक्षित देखभालीच्या अनुषंगाने आवश्यक कार्यवाही करण्यात आली आहे.
जनावरांची वाहतूक करताना त्यांचे कल्याण ही कायदेशीर जबाबदारी
जनावरांची वाहतूक म्हणजे केवळ त्यांना एका ठिकाणाहून दुसऱ्या ठिकाणी नेणे नसून त्यांच्या जीविताची, आरोग्याची, सुरक्षिततेची व कल्याणाची योग्य काळजी घेणे ही वाहतूक करणाऱ्याची कायदेशीर जबाबदारी आहे.
Transport of Animals Rules, 1978 मध्ये गुरांच्या वाहतुकीसाठी विविध सुरक्षा व कल्याणविषयक तरतुदी करण्यात आलेल्या आहेत. त्यामध्ये जनावरे प्रवासासाठी तंदुरुस्त असल्याबाबत पशुवैद्यकीय प्रमाणपत्र, आवश्यक प्रथमोपचाराची व्यवस्था, जनावरे पाठविणारा व स्वीकारणारा यांची माहिती, चारा-पाण्याची व्यवस्था तसेच वाहनातून वाहतूक करताना जनावरांच्या सुरक्षिततेसाठी आवश्यक खबरदारी घेण्याच्या तरतुदींचा समावेश आहे.
तसेच प्राण्यांवरील क्रूरता प्रतिबंधक अधिनियम, 1960 चे कलम 11(1)(d) हे एखाद्या प्राण्याला अनावश्यक वेदना किंवा त्रास होईल अशा पद्धतीने अथवा स्थितीत त्याची वाहतूक करण्यास प्रतिबंध करते. त्यामुळे पशुधनाची वाहतूक करणाऱ्या वाहनचालक, मालक व संबंधित व्यक्तींनी लागू कायदे व नियमांचे काटेकोर पालन करणे आवश्यक आहे.
मुक्या जीवांच्या संरक्षणासाठी बारामती शहर पोलीस सजग
वेळीच मिळालेली माहिती, नागरिकांचे सहकार्य आणि पोलिसांची तत्पर कायदेशीर कार्यवाही यामुळे दोन मुक्या गोवंश जनावरांना सुरक्षित ताब्यात घेणे शक्य झाले. कायदा व सुव्यवस्था राखण्याबरोबरच मुक्या प्राण्यांचे संरक्षण आणि त्यांच्याशी क्रूर वर्तनास प्रतिबंध करणे यासाठीही बारामती शहर पोलीस संवेदनशील व कटिबद्ध आहेत.
बारामती शहर पोलीस स्टेशन हद्दीत गोवंश अथवा इतर जनावरांची संशयास्पद वाहतूक, नियमांचे उल्लंघन करून जनावरांची वाहतूक किंवा कत्तलीच्या उद्देशाने गोवंशाची वाहतूक होत असल्याबाबत नागरिकांना विश्वासार्ह माहिती मिळाल्यास स्वतः कायदा हातात न घेता तात्काळ बारामती शहर पोलीस स्टेशन अथवा डायल 112 वर माहिती द्यावी. प्राप्त माहितीची कायदेशीर पडताळणी करून आवश्यक ती कारवाई करण्यात येईल. माहिती देणाऱ्या नागरिकांची ओळख आवश्यकतेनुसार गोपनीय ठेवण्यात येईल.
“सजग नागरिकांचे सहकार्य आणि पोलिसांची तत्परता हीच बेकायदेशीर कृत्यांविरुद्धची प्रभावी ताकद. कायदा हातात न घेता पोलिसांना माहिती द्या; मुक्या प्राण्यांच्या संरक्षणासाठी बारामती शहर पोलीस सदैव तत्पर आहेत.”
सदर गुन्ह्याचा पुढील तपास पोलीस हवालदार श्री. रामचंद्र शिंदे हे करीत आहेत.
प्रभारी पोलीस निरीक्षक
(श्रीशैल चिवडशेट्टी)
बारामती शहर पोलीस स्टेशन, पुणे ग्रामीण
